Escrive pèr tu

Quouro marche dins la coulino,
Quouro nade dins li calanco,
Quouro grimpe sus li restanco,
Quouro sièu soul sus lou camin,
Escrive pèr tu, o ma bello...

Sus li roucas o sus la plajo,
Dins la garrigo o la pinedo,
Escrive pèr tu, o ma bello...

Quouro l’auro esbrando mi péu,
Quouro ai de sablo dins mis iue,
Quouro la sau vèn sus mi labro,
Que lou soulèu usclo ma pèu,
Escrive pèr tu, o ma bello...

Dins moun enfanço e ma jouvènço,
Dins moun bèu tems e ma vieiesso,
Escrive pèr tu, o ma bello...

Dins l’alegresso, dins l’estrànsi,
De la primo-aubo à jour fali,
Pèr t’ama de touto moun amo
E pèr te canta moun amour,
Escrive pèr tu, o ma bello...

Escrive pèr tu, o ma muso,
Escrive pèr tu ma Prouvènço !